Vísaði frá kröfu um að lánssamningi vegna SPRON-bréfa yrði rift

Héraðsdómur Reykjavíkur hefur vísað frá kröfu þrotabús Insolidum, fyrirtækis Daggar Pálsdóttur hæstaréttarlögmanns og varaþingmanns og sonar hennar, Páls Ágústs Ólafssonar, um að lánssamningi við Saga Capital vegna kaupa á stofnfjárbréfum í SPRON verði rift. Hins vegar var hafnað kröfu Saga Capital um frávísun á kröfu Insolidum um að kaupsamningi vegna bréfanna yrði rift.

Saga Capital og Insolildum hafa frá því á síðasta ári tekist á um umrædd stofnfjárbréf í SPRON og fjármögnun þeirra. Forsaga málsins er sú að Insolidum keypti stofnfjárbréf í SPRON í gegnum Saga Capital í júlí á síðasta ári. Bréfin keypti félagið fyrir tæpar 600 milljónir og Saga Capital fjármagnaði allt saman. Eftir standa 320 milljónir af skuldbindingunni.

Eftir að gengi bréfanna í SPRON féll mikið á fyrstu mánuðum félagsins á markaði fór Saga Capital fram á svokallað veðkall, það er aukið tryggingafé vegna bréfanna. Í kjölfarið af því reyndi Insolidum að rifta samningum við bankann á þeim forsendum að reglur hefðu verið brotnar í viðskiptum með bréfin. Insolidum hætti á sama tíma að greiða af láninu jafnvel þótt samningurinn væri í fullu gildi þar til búið er að taka afstöðu til málsins fyrir dómi.

Þá fór Saga Capital fram á að fá öll hlutabréf í fyrirtækinu og yrði þar með réttmætur eigandi fyrirtækisins. Það mál fór fyrir Héraðsdóm og síðar Hæstarétt sem féllst ekki á þessa kröfu fjárfestingarbankans. Þá fór Saga Capital fram á að Insolidum yrði tekið til gjaldþrotaskipta og féllst héraðsdómur á það í maí. Hæstiréttur staðfesti það og er félagið því gjaldþrota.

Í málinu sem dómurinn fjallaði um í dag var tekin fyrir krafa þrotabús Insolidum um að samningi félagsins við Saga Capital um kaup á bréfunum í SPRON yrði rift og sömuleiðis að lánssamningi vegna kaupanna yrði rift. Fóru forsvarsmenn Insolidum fram á þetta á þeim grundvelli að Saga Capital hefði beitt blekkingum við viðskiptin, bæði með því að greina ekki frá því hver væri seljandi stofnfjárbréfanna og með því að verðmæti stofnfjárhluta hafi í reynd aðeins verið um 60 prósent af því verði sem greitt hafi verið fyrir þá.

Héraðsdómur Reykjavíkur féllst ekki á að vísa ætti frá kröfu Insolidum um að rifta samningi um kaup á bréfunum eins og Saga Capital fór fram á. Hins vegar vísaði dómurinn frá þeirri kröfu Insolidum að lánssamningi vegna kaupa á bréfunum yrði rift.