Van Persie tryggði Arsenal sigur á Chelsea

Arsenal vann í kvöld frækinn 2-1 sigur á Chelsea á Stamford Bridge í grannaslag liðanna í ensku úrvalsdeildinni.

Það var Johan Djorou sem kom Chelsea á bragðið með sjálfsmarki á 31. mínútu, en Robin Van Persie skoraði tvö mörk á þremur mínútum í síðari hálfleiknum og tryggði gestunum sigurinn.

Fyrra mark Van Persie í dag var greinilegt rangstöðumark, en Arsenal þurfti nauðsynlega á sigri að halda eftir misjafnt gengi að undanförnu. Liðinu hefur ekki gengið vel heilt yfir í deildinni, en þó hefur liðið nú unnið sigra á Chelsea og Manchester United.

Chelsea fékk blauta tusku framan í sig í dag þegar liðið fékk á sig tvö mörk á skömmum tíma eftir að hafa verið betri aðilinn í leiknum.

Chelsea tapaði ekki á heimavelli í fjögur ár, en hefur nú tapað heima fyrir Liverpool og Arsenal á aðeins þremur vikum.

Chelsea er enn á toppi deildarinnar með 33 stig en Liverpool getur náð þriggja stiga forskoti með sigri á West Ham annað kvöld.

Arsenal neitar að gefa frá sér möguleikann á titlinum þó hann sé ef til vill langsóttur, en liðið skaust í fjórða sætið í dag og hefur 26 stig - tveimur minna en Manchester United sem er í þriðja sætinu.