Landsbankinn selur Kepler til stjórnar og starfsmanna

Skilanefnd Landsbankans hefur gengið frá sölu á fjármálafyrirtækinu Kepler Capital Markets til stjórnar og starfsmanna fyrirtækisins.

Í tilkynningu um málið frá skilanefndinni segir að salan sé í samræmi við stefnu nefndarinnar að hámarka virði þeirra eigna sem Landsbankinn átti er hann komst í þrot í haust.

Starfsemi Kepler verður óbreytt og segir Laurent Quirin forstjóri Kepler að hann vilji þakka öllum sem komu að málinu fyrir fagmannleg vinnubrögð.

Lárus Finnbogason formaður skilanefndar Landsbankans segir að nefndin sé mjög ánægð með að hafa leitt mál þetta til lykta á farsælan hátt með tilliti til þeirrar stöðu sem nú er á fjármálamarkaðinum.

Kepler er alhlið þjónustufyrirtæki á fjármálamarkaðinum og hefur skrifstofur í Amsterdam, Frankfurt, Geneva, Milan, Paris, Madrid, Zurich og New York.