Tottenham og United skildu jöfn

Manchester United varð að horfa á eftir tveimur stigum líkt og Arsenal og Liverpool fyrr í dag þegar liðið gerði markalaust jafntefli við Tottenham á útivelli í lokaleiknum í ensku úrvalsdeildinni.

Heimamenn í Tottenham þakka eflaust fyrir stigið þar sem þeir áttu undir högg að sækja á löngum köflum í síðari hálfleik - en heimamenn voru reyndar talsvert hættulegri í fyrri hálfleiknum.

Liðið var án fyrirliðans Ledley King í vörninni og þurfti strax í upphafi að horfa á eftir Jonathan Woodgate fara meiddan af velli.

Það voru hinsvegar varnarmaðurinn Michael Dawson og markvörðurinn Heurelho Gomes sem voru menn leiksins hjá heimamönnum, en þeir komu hvað eftir annað í veg fyrir að gestirnir næðu að skora.

Framherjinn Dimitar Berbatov lék þarna sinn fyrsta leik fyrir United eftir að hann fór frá Tottenham í sumar og áhorfendur létu hann vita hvað þeim fannst um það með því að baula á hann í hvert skipti sem hann fékk boltann í leiknum.

Manchester United fer nú í til Japan á HM félagsliða sex stigum á eftir toppliðunum - og mögulega lengra á eftir ef Chelsea vinnur á morgun.

United hefur 32 stig í þriðja sæti en Tottenham er komið upp í 14. sæti með 19 stig.