Aflaverð HB Granda á síld og makríl 1,6 milljarður kr.

Alls veiddu skip HB Granda rúmlega 50 þúsund tonn af norsk-íslenskri síld og makríl á árinu og nemur aflaverðmætið um 1,6 milljarði króna.

Í frétt um málið á vefsíðu HB Granda er rætt við Vilhjálm Vilhjálmsson, deildarstjóra uppsjávarsviðs HB Granda, sem segir að úthaldsdagar Faxa RE, Ingunnar AK og Lundeyjar NS á síldveiðum úr norsk-íslenska síldarstofninum og á makrílveiðunum voru alls 290 talsins.

Meðalaflaverðmæti á úthaldsdag var því um 5,5 milljónir króna og meðalverð á kíló nam um 32 ísl. kr/kg. Uppistöðu aflans, eða um 40 þúsund tonnum, var landað á Vopnafirði. 5.700 tonnum var landað í Noregi, 2.000 tonnum í Færeyjum og um 3.000 tonnum á Eskifirði. Síldaraflinn fór ýmist til vinnslu eða í bræðslu og makrílaflinn fór að mestu til bræðslu.

,,Við eigum eftir um 5.000 tonn óveidd af norsk-íslenska síldarkvótanum en munum geta nýtt okkur þann kvóta á næsta ári," segir Vilhjálmur Vilhjálmsson.