Verðbólga eykst enn í Bretlandi

Vísitala neysluverðs fyrir júlí var birt í Bretlandi í morgun og jókst ársverðbólga úr 3,8% í 4,4% milli mánaða. Greiningaraðilar höfðu búist við heldur minni verðbólgu, eða 4,2%, samkvæmt meðalspá könnunar Bloomberg fréttaveitunnar. Þetta er þriðji mánuðurinn í röð sem verðbólga í Bretlandi er yfir 3% efri þolmörkum Englandsbanka, en bankinn er á 2% verðbólgumarkmiði.

Þá hefur verðbólga í Bretlandi ekki verið meiri frá því að núverandi fyrirkomulag peningamála var tekið upp árið 1997. Kjarnaverðbólga, þar sem búið er að undanskilja orku-, matvæla, áfengis- og tóbakskostnað, mældist 1,9% í júlí og hefur ekki verið meiri í rúmt ár. Mikill verðbólguþrýstingur gerir Englandsbanka erfitt um vik með að lækka stýrivexti til að bregðast við versnandi hagvaxtarhorfum, en stýrivextir bankans eru nú 5%.

Þetta kemur fram í morgunkorni Glitnis í morgun.