Ísland á ofarlega á blaði yfir stærstu fjármálaklúður ársins

Tímaritið Time hefur sett saman lista yfir tíu verstu fjármálaklúður ársins. Ísland er þar á blaði ásamt öðrum stórslysum í fjármálaheiminum þetta árið; Lehman Brothers, AIG, Alan Greenspan, bandarískum bílaframleiðendum, Freddie Mac og Fannie Mae, matsfyrirtækjum, vogunarsjóðum og öðrum sem þótt hafa borið af í vandræðagangi árið 2008.

„Þrír stórir bankar, 300.000 manns og ekkert lausafé. Það er ekki oft sem auðæfi heillar þjóðar þurrkast út en Íslandi tókst það næstum því þegar fjárfestar flúðu og gjaldmiðillinn hrundi," segir í rökstuðningi fyrir valinu.

Vaxtasólgnir sparifjáreigendur í Bretlandi og Þýskalandi eru sagði hafa farið illa út úr viðskiptum sínum við bankana þrjá, og landið hafi fyrir rest þurft að leita á náðir Alþjóðagjaldeyrissjóðsins. Og meira að segja beðið Rússa um hjálp.

En blaðið bendir líka á björtu hliðarnar: „Ísland er skítblankt, en landið á jarðhita, svo að minnsta kosti frýs enginn til dauða."