Hæstiréttur dæmir West Ham í óhag í Tevez málinu

Hæstirættur hefur úrskurðað að West Ham megi að svo stöddu ekki áfrýja Tevez málinu svokallaða til Áfrýjunardómstóls Íþrótta í Frakklandi.

Þetta þýðir að forráðamenn Sheffield United muni væntanlega hefjast handa við að sækja 30 milljón punda skaðabótakröfu sína á hendur West Ham - en sumir segja að sú tala verði jafnvel enn hærri.

Sheffield United mun væntanlega fara fram á að málið verði tekið fyrir að fullu í hæstarétti á næsta ári og að þar fáist endanlegt bann á að málinu verði áfrýjað til áfrýjunardómstólsins.

Þá er ekki útiloka að fleiri félög eða einstakir leikmenn muni fara fram á skaðabætur frá West Ham.

Gerðardómur úrskurðaði Sheffield United í hag á sínum tíma þegar félagið sótti mál sitt gegn West Ham fyrir að nota ólöglegan leikmann á leiktíðinni 2006-7.

Sá var Carlos Tevez en West Ham bjargaði sér frá falli um vorið, meðal annarra á kostnað Sheffield United.

Þar að auki var sagt frá því að tíu leikmenn Sheffield United gætu lögsótt West Ham af sömu ástæðum og félagið gerði það.

Leikmenn urðu af bónusgreiðslu er liðið féll auk þess sem þeir þurftu margir að sætta sig við launalækkun á næsta keppnistímabili.

Forráðamenn Bolton hafa ekki útilokað að leita réttar síns í málinu þar sem stjórnarformaður félagsins benti á að tap liðsins fyrir West Ham hefði kostað félagið eitt sæti í deildinni - og þar með 700 þúsund pund í verðlaunafé.

Ljóst er að ef forráðamenn Sheffield United fá sínu fram í málinu, muni það reynast West Ham þungur biti til að kyngja, enda hefur heimskreppan komið illa niður á Björgólfi Guðmundssyni eiganda félagsins.