Benítez: Áttum að taka þrjú stig

„Við áttum klárlega skilið að vinna leikinn," sagði Rafa Benítez, stjóri Liverpool, eftir markalaust jafntefli gegn West Ham. Liverpool tókst ekki að finna leið framhjá Robert Green í marki Hamrana.

„Við sóttum til sigurs frá upphafi til enda. Þeir áttu eina eða tvær skyndisóknir í seinni hálfleik. Mitt lið lék mun betur en oft áður en náði ekki að skora. Þetta eru vonbrigði," sagði Benítez.

Liverpool gerði markalaust jafntefli annan leikinn í röð á heimavelli en fyrir rúmri viku lék það gegn Fulham. „Við lékum ekki vel gegn Fulham en í þessum leik áttum við fullt af góðum sóknum og fengum góð færi. Ef þú spilar illa og skapar þér ekki færu þá geturðu haft áhyggjur. Það á þó ekki við um okkur," sagði Benitez.

„Það er ekki gott að vinna ekki á heimavelli en þegar fólk skoðar blöðin á morgun sér það okkur á toppnum. Við erum stigi á undan Chelsea og ef við vinnum Blackburn um næstu helgi verðum við enn á toppnum."

Liverpool saknar greinilega Fernando Torres sem er meiddur. Benítez var spurður af því hvort liðinu skorti sjálfstraust fyrir framan mark andstæðingana: „Kannski er það vandamálið hjá einhverjum leikmaður. En ég er viss um að ef við höldum áfram að skapa svona færi þá förum við að nýta þau," sagði Benítez.

Hann var síðan spurður að því hvort Liverpool ætlaði að ná sér í annan sóknarmann í janúar, jafnvel Michael Owen? „Ég get lofað þér því að við erum ekki að fara að kaupa Michael Owen," sagði Benítez að lokum.

Craig Bellamy, sóknarmaður West Ham, var að leika gegn sínum fyrrum félögum. Hann var óheppinn að ná ekki að skora í fyrri hálfleik þegar hann átti hörkuskot í stöngina.

„Þetta voru góð úrslit fyrir okkur og veitir okkur vonandi meira sjálfstraust. Með smá heppni hefðum við getað unnið. Það er mjög erfitt að sækja stig á Anfield því að Liverpool hefur frábæra leikmenn og bestu stuðningsmenn heims. Við áttum hættulegar skyndisóknir," sagði Bellamy.