Ferguson fundaði með Tevez

Sir Alex Ferguson stjóri Manchester United hefur haldið fund með framherjanum Carlos Tevez til að ítreka að hann sé stór þáttur í framtíðarplönum sínum.

Breska blaðið Guardian greinir frá þessu í dag, en Tevez hefur minna fengið að spila undanfarið eftir komu Dimitar Berbatov. Vitað er að Real Madrid hefur nokkurn áhuga á að fá Tevez í sínar raðir ef honum hætti að líka lífið á Englandi.

"Ég settist niður með honum í síðustu viku til að ítreka að við höfum fulla trú á honum og að hann sé toppleikmaður í augum mínum og stuðningsmanna félagsins. Það er bara ekki hægt að koma þremur leikmönnum í tvær stöður á vellinum, þó vera megi að við gerum það í einstaka leikjum. Okkur gengur vel og því vil ég síður hræra í liðinu. Carlos skilur þetta og ég hef gert honum ljóst að þegar tímabilið fer á fullt - munum við þurfa á öllum að halda," sagði Ferguson.