Einn Bentley er ekki nóg

Knattspyrnumenn á ofurlaunum þurfa ekki að hafa miklar áhyggjur af heimskreppunni.

Breska blaðið News of the World segir frá því um helgina að leikmenn Manchester United hafi verið duglegir að versla um jólin.

Þannig eru herra og frú Wayne Rooney sögð hafa splæst um 300,000 pundum í jólagjafir handa hvort öðru. Það reiknast um 56 milljónir króna ef marka má skotheldar gengistölur frá Seðlabanka Íslands.

Rooney gaf konu sinni rándýrt úr og glæsilega Bentley bifreið, en þetta var annar Bentley-inn sem hann gefur spúsu sinni. Sá nýi ku hafa verið fallegri á litinn en sá eldri. Kona Rooney gaf honum fokdýrt úr í jólagjöf.

Rooney var ekki sá eini sem var að versla sér Bentley, því þeir Ryan Giggs, Cristiano Ronaldo og Edwin van der Sar voru allir að kaupa sér nýjan Bentley á dögunum samkvæmt heimildum blaðsins.