Mourinho spáir því að Liverpool gefi eftir

Jose Mourinho telur að baráttan um Englandsmeistaratitilinn muni á endanum standa milli Chelsea og Manchester United. Hann spáir því að Liverpool, sem nú vermir toppsætið, muni gefa eftir.

„Byrjunin hefur verið mjög góð hjá Liverpool en ég held samt að þegar allt kemur til alls muni Chelsea og Manchester United berjast um titilinn," sagði Mourinho.

Þegar hann var spurður út í það álit margra að Chelsea spili skemmtilegri fótbolta undir stjórn Luiz Felipe Scolari en það gerði undir hans stjórn var svarið: „Ég veit að ég afrekaði margt hjá Chelsea og er viss um að Scolari muni einnig gera það. Við förum ólíkar leiðir til að ná markmiðum okkar en árangurinn er það sem skiptir mestu," sagði Mourinho.