Stjórn Crewe fundar í kvöld

Stjórn enska C-deildarfélagsins Crewe mun í kvöld funda til þess að ræða þá sem til greina koma sem eftirmaður Steve Holland sem var rekinn úr starfi í síðasta mánuði.

Þetta kemur fram á fréttavef BBC í dag en einnig er greint frá því að David Platt, fyrrum leikmaður enska landsliðsins, hafi hafnað boði um að taka við starfi knattspyrnustjóra hjá félaginu.

Einn þeirra sem sótti um stöðuna er Guðjón Þórðarson, fyrrum þjálfari ÍA.

Crewe er sem stendur í neðsta sæti deildarinnar með níu stig eftir nítján leiki.