Lífeyrissjóðurinn Stapi lækkar vexti á lánum í 4,2%

Á stjórnarfundi Stapa lífeyrissjóðs í dag var ákveðið að lækka vexti sjóðfélagalána í 4,2% frá 1. janúar n.k., en áður höfðu þeir verið lækkaðir úr 5,7% í 5,2% 1. desember sl.

Jafnframt var ákveðið að setja hámark á ný lán sjóðfélaga, 10 milljónir kr, en áður ákvarðaðist hámarkið eingöngu af veðhæfi fasteignar.

„Við viljum með þessu reyna að koma til móts við okkar sjóðfélaga á erfiðum tímum." segir Kári Arnór Kárason framkvæmdastjóri Stapa lífeyrissjóðs í umfjöllun um málið á heimasíðu sjóðsins.

„Lækkun vaxta og þar með lækkun á greiðslubyrði er að okkar mati skynsamlegasta leiðin við núverandi aðstæður. Það er okkar skoðun að mikilvægt sé bæði fyrir okkar félagsmenn og sjóðinn að sem flestir geti staðið í skilum. Aukin vanskil og dýrar innheimtuaðgerðir munu bitna bæði á sjóðnum og okkar félagsmönnum og við viljum reyna að komast hjá slíkum aðgerðum í lengstu lög. Þetta mun að sjálfsögðu ekki leysa vanda allra en er vonandi gott framlag til þess að gera framtíðina eitthvað bærilegri."

Þá ákvað stjórn Stapa einnig að lækka tímabundið dráttarvexti af iðgjaldakröfum til sjóðsins. Dráttarvextir af iðgjaldakröfum verða því einungis 10% frá 1. október sl. (þegar bankahrunið varð) til 28. febrúar 2009 vegna uppgjöra sem gerð eru á þessu tímabili. Þeir sem ekki gera upp vanskil á þessu tímabili munu hins vegar greiða þá almennu dráttarvexti sem í gildi eru.