Glitnir setur sér verklagsreglur

Nýi Glitnir birti á föstudag á vefsvæði sínu vinnuramma um úrlausnir fyrir fyrirtæki sem eiga í tímabundnum erfiðleikum. Vinnuramminn er settur fram í framhaldi af yfirlýsingu ríkisstjórnarinnar um aðgerðir til að bæta rekstrarumhverfi fyrirtækja frá 2. desember sl..

Þetta kemur fram í tilkynningu frá Gltini.

„Eins og fram hefur komið erum við að fara af stað í metnaðarfullt verkefni við að byggja upp nýjan banka. Mikilvægur þáttur í því verkefni er að auka gagnsæi um starfsemi hans. Íslenskir bankar þurfa að endurvinna traust og ég tel aukið gagnsæi vera skref í þá átt," segir Birna Einarsdóttir bankastjóri Glitnis.

Auk þess hefur bankinn birt starfsreglur stjórnar og áhættunefndar á vefnum. Þetta er hluti af þeirri stefnu bankans að auka gagnsæi í starfsemi sinni og skýra betur þær reglur og ferli sem hann starfar eftir.