Vatn Jóns í evrópskar einkaþotur

Fyrirtæki Jóns Ólafssonar, Icelandic Water Holdings, hefur gert þriggja ára samning við þotuleiguna NetJets Europe, um sölu á Iceland Glacial vatni sínu í vélar félagsins.

NetJets leigir þotur sínar til viðskiptafólks og fyrirtækja og starfar á um 870 flugvöllum um alla Evrópu. Vatnið verður í boði í líters og 330 millilítra flöskum í öllu flugi félagsins.

Vefsíðan just-drinks.com segir að engar fjárhæðir fáist gefnar upp, en hefur eftir Jóni að fyrirtækið sé stolt af samningnum við þetta virta fyrirtæki.

Icelandic Water Holdings ehf.gangsetti í lok september nýja verksmiðju í landi Hlíðarenda í Ölfusi. Verksmiðjan er um 6.700 fermetrar að stærð og mun í fyrri áfanga anna átöppun um 100 milljón lítra á ári. Á annan tug manna vinnur nú í verksmiðjunni.