Nettóskuldir þjóðarinnar eru nú 2.300 milljarðar kr.

Hrein skuldastaða þjóðarbúsins við útlönd var neikvæð um 2.302 milljarða kr. í lok þriðja ársfjórðungs og versnaði um 184 milljarða kr. á ársfjórðungnum.

Þessi þróun stafar einkum af veikingu gengis krónunnar. Erlendar eignir námu 9.955 milljörðum kr. í lok ársfjórðungsins en skuldir 12.257 milljörðum kr.

Á heimasíðu Seðlabanka Íslands hafa nú verið birt bráðabirgðayfirlit um greiðslujöfnuð við útlönd á þriðja ársfjórðungi 2008 og um stöðu þjóðarbúsins í lok fjórðungsins.

Viðskiptajöfnuður var óhagstæður um 109,6 milljarða kr. á þriðja fjórðungi ársins sem er talsvert lægra en á fjórðungnum á undan. Minni halli þáttatekna og á þjónustujöfnuði skýra þessa breytingu að mestu en aukinn halli af vöruviðskiptum vegur nokkuð á móti. Minna tap varð á beinni fjárfestingu Íslendinga en vaxtakostnaður vegna erlendra skulda hækkaði.

Hreint fjárinnstreymi nam 166,8 milljörðum kr. á tímabilinu. Bein fjárfesting innlendra aðila erlendis jókst um 49 milljarða kr. en bein fjárfesting erlendra aðila á Íslandi dróst saman um 18,8 milljarða kr. og umtalsverður samdráttur var á verðbréfafjárfestingum erlendra aðila á Íslandi. Fjárinnstreymið stafar af sölu innlendra fjárfesta á erlendum skuldabréfum og af erlendum lántökum opinberra aðila.