Pattstaða vegna kaupa á 5 milljarða króna hlut í Glitni

Pattstaða er komin upp vegna mögulegra málaferla Salt Invest gegn gamla Glitni. Salt keypti hlutabréf fyrir bréf í bankanum sem námu alls 5 milljörðum að markaðsvirði örfáum dögum áður en að bankinn var þjóðnýttur. Að öllu óbreyttu væru peningarnir glataðir en forsvarsmenn Salt hafa sagt að til greina komi að stefna Glitni vegna málsins.

„Það er búið að setja lög sem gera það að verkum að þú getur ekki farið í mál við bankana og það hefur lítið upp á sig að fara í mál við bankana á meðan að svo er," segir Árni Harðarson, forstjóri Salt. „Það sem þyrfti að gera væri fyrst að höfða mál til að sýna fram á að lögin séu andstæði stjórnarskrá. Þannig að við erum ekkert búnir að hreyfa okkur með þetta," segir Árni. Hann bætir því þó við að hann sé í stöðugu sambandi við Glitni vegna málsins.

Árni segir að forsvarsmenn Salt Invest séu ekki búnir að ákveða hvort þeir hafi áhuga á því að stefna ríkinu vegna neyðarlaganna. „En það er alveg klárt að við ætlum ekkert að sitja undir þessu og þetta verður keyrt áfram í einhverja niðurstöðu," segir Árni.