Viðskiptafólk ársins 2008

Eflaust hefur sjaldan verið jafn erfitt að finna mann ársins í viðskiptalífinu og nú. Helstu viðskiptablöð landsins hafa þó hver fundið sinn mann og konu.

Rannveig Rist, forstjóri Alcan á Íslandi, varð fyrir valinu hjá Frjálsri verslun. Rannveig hlýtur þennan heiður fyrir mikla leiðtogahæfileika, hæfni við rekstur álversins í Straumsvík, frumkvöðlastarf á sviði menntunar í stóriðju og forystu í málefnum kvenna í atvinnulífinu. Rannveig hefur verið forstjóri álversins í Straumsvík í tólf ár og allan þann tíma hefur fyrirtækið verið rekið með hagnaði.

Árni Oddur Þórðarson, forstjóri Eyris og stjórnarformaður Marels hlaut nú í hádeginu viðskiptaverðlaun Viðskiptablaðsins. Árni Oddur er forstjóri Eyris Invest sem er kjölfestufjárfestir í bæði Marel og Össuri en þessi tvö félög hafa staðið sterk í gegnum kreppuna og bréf þeirra í Kauphöll Íslands ekki fallið eins hratt og bréf í öðrum fyrirtækjum.

Þá er Jón Sigurðsson, forstjóri Össurar, maður ársins í viðskiptalífinu 2008 í kosningu Markaðarins, viðskiptablaði Fréttablaðsins. Í umsögn um Jón segir meðal annars að hann hafi stýrt fyrirtækinu vel og fest það í sessi sem helsta stoðtækjafyrirtæki heims.