Neytendur eru enn mjög svartsýnir á framtíðina

Íslenskir neytendur eru mjög svartsýnir í lok ársins samkvæmt Væntingavísitölu Gallup, en vísitala desembermánaðar var birt í morgun.

Greining Glitnis fjallar um málið í Morgunkorni sínu. Þar segir þetta komi eflaust engum á óvart enda skelfilegt ár að baki í efnahagslegu tilliti en þar leikur fjármálakreppan sem braust út á haustdögum stærsta hlutverkið.

Vísitalan mælist nú 25,3 stig sem er örlítið hærra en í síðasta mánuði þegar vísitalan fór niður í sitt langlægsta gildi frá upphafi, 23,2 stig. Til samanburðar var vísitalan 117 stig á sama tíma fyrir ári síðan.

Hæst fór Væntingavísitalan í maí 2007 þegar hún var 154,9 stig. Þegar vísitalan mælist undir 100 stigum eru fleiri svarendur neikvæðir en jákvæðir á stöðu og horfur í efnahagslífinu. 90% íslenskra neytenda telja núverandi ástand í efnahagsmálum slæmt en aðeins 0,9% neytenda telur það vera gott um þessar mundir.

Þessar niðurstöður geta varla talist annað en eðlilegar í ljósi þeirra aðstæðna sem nú blasa við íslenska hagkerfinu og þeirra áfalla sem dunið hafa á íslenskum neytendum að undanförnu.