Lübbecke úr fallsvæðinu

TuS N-Lübbecke vann í dag afar mikilvægan sigur á Göppingen í þýsku úrvalsdeildinni í handbolta í dag.

Birkir Ívar Guðmundsson lék í marki Lübbecke en Þórir Ólafsson er frá vegna meiðsla. Jaliesky Garcia skoraði fjögur mörk fyrir Göppingen.

Lübbecke hoppaði úr því næstneðsta sæti í það fjórða neðsta með sigrinu og er nú með ellefu stig. Göppingen er í áttunda sæti deildarinnar.

Einar Örn Jónsson skoraði eitt mark fyrir Minden sem er í þriðja neðsta sæti deildarinnar eftir að liðið tapaði stórt fyrir botnliði Essen, 33-23.

Þá vann Nordhorn fimm marka sigur á Wetzlar, 35-30.