Barbie-skór Bendtner vöktu litla lukku

Svo virðist sem danski framherjinn Nicklas Bendtner hjá Arsenal hafi misst af því þegar William Gallas kallaði á meiri hörku í leikmannahóp liðsins á dögunum.

Gallas missti fyrirliðabandið og stöðu sína í liðinu um helgina þegar hann kallaði félaga sína of lina og gagnrýndi þá harðlega í fjölmiðlum í síðustu viku.

Bendtner virðist hafa misst af heröskri Frakkans, því hann frumsýndi nýja takkaskó í leiknum við Manchester City um helgina. Þeir voru Barbie-bleikir eins og sjá má á myndinni með fréttinni.

Arsenal tapaði leiknum 3-0 fyrir Robinho og félögum, sem sýndu prýðilega spilamennsku í leiknum á meðan Arsenal menn voru heillum horfnir.

Skórnir sem um ræðir eru frá Nike og kallast Mercurial Vapor Rosas.

Það var Frakkinn Franck Ribeiry hjá Bayern Munchen sem lék í auglýsingaherferðinni í kring um skóna á sínum tíma, þar sem hann spígsporaði um í þeim undir þemalagi kvikmyndanna um Bleika Pardusinn.