Hópuppsagnir í nóvember náðu til 560 manns

Þrátt fyrir að mun minna hafa verið um hópuppsagnir í nóvember heldur en í október misstu engu að síður 560 manns vinnuna í nóvember í hópuppsögnum, en alls bárust Vinnumálastofnun 12 tilkynningar um hópuppsagnir í mánuðinum.

Greining Glitnis fjallar um málið í Morgunkorni sínu. Þar kemur fram að alls hefur hátt í 5.000 manns verið sagt upp í hópuppsögnum það sem af er þessu ári. 11% uppsagnanna barst í nóvembermánuði.

 

Langstærstur hluti hópuppsagnanna varð í október en þá misstu tæplega 3.000 manns vinnuna í samtals 64 hópuppsögnum. Flestar tilkynningarnar um hópuppsagnir í nóvember komu frá verslunum, flutningum og tengdum greinum eða tæplega helmingur. Uppsagnirnar urðu að stærstum hluta vegna starfsfólks á höfuðborgarsvæðinu enn einnig töpuðust störf á Suður- og Vesturlandi.

 

Misjafnt er hvenær þær hópuppsagnir sem gripið hefur verið til á árinu koma til framkvæmda. Ljóst er að áramótin og fyrstu mánuðir næsta árs munu verða mörgum erfið enda kemur mikið hópuppsögnum þá til framkvæmda. Vinnumálastofnun reiknast til að um 1.000 manns verði atvinnulaus eða án launagreiðslna vegna hópuppsagna um áramótin og að á bilinu 600 -700 uppsagnir komi til framkvæmda næstu þrenn mánaðarmót á eftir, mest í byrjun marsmánaðar. Ljóst er að afar erfitt ástand verður á vinnumarkaði í upphafi næsta árs og enn gæti komið til fleiri hópuppsagna á næstu mánuðum.

 

Þegar allar hópuppsagnir ársins eru skoðaðar eftir atvinnugreinum kemur á daginn að langflestar þeirra koma úr mannvirkjagerð eða 42%. Þetta endurspeglar hversu erfitt umhverfi byggingariðnaðurinn býr nú við en fjármálakreppan leggst sértaklega þungt á hann. Íbúðamarkaðurinn er nær algjörlega frosinn og ólíklegt er að mikill eftirspurn verði eftir nýjum íbúðum á næstunni.

 

Aðrar atvinnugreinar sem hafa fundið áþreifanlega fyrir versnandi atvinnuástandi eru verslunar- og viðgerðarmenn en 15% hópuppsagnanna ná til þessa hóps. 14% uppsagnanna eru úr fjármála og tryggingastarfsemi og 11% úr flutningum. 7% hópuppsagnanna sem gripið hefur verið til á árinu eru í öðrum iðnaði.