Vöruskiptin áfram hagstæð

Samkvæmt bráðabirgðatölum fyrir nóvember 2008 nam útflutningur 43,2 milljörðum króna og innflutningur 40,8 milljörðum króna. Vöruskiptin, reiknuð á fob verðmæti, voru því hagstæð um 2,4 milljarða króna samkvæmt bráðabirgðatölum.

Fjallað er um málið á vefsíðu Hagstofunnar. Þar segir að vegna mikilla hreyfinga á gengi krónunnar er samanburður á breytingum á milli mánaða erfiður. Bent er á að gengishækkun mæld með vöruviðskiptavog, sem Hagstofan notar til uppreiknings talna, var 13,5% á milli október og nóvember.

Vísbendingar eru um minna verðmæti útfluttra sjávarafurða og áls en aukið verðmæti innfluttra hrá- og rekstrarvara miðað við október 2008.