Bein fjárfesting er heimil samkvæmt gjaldeyrisreglunum

Bein fjárfesting fellur ekki undir reglur Seðlabankans um gjaldeyrismál nema að mjög takmörkuðu leyti.

Með beinum fjárfestingum er átt við, líkt og segir í lögum um gjaldeyrismál, fjárframlag eða annað framlag til eigin fjár atvinnufyrirtækis eða kaup á eignarhlut til að öðlast virk áhrif á stjórn þess. Virk áhrif miðast við 10% eignarhlut eða stærri.

Greining Glitnis fjallar um málið í Morgunkorni sínu. Þar segir að nokkur óvissa hafi verið um þennan þátt gjaldeyrishaftanna. Ljóst er að höft á þessa fjármagnsflutninga myndu setja í uppnám uppbyggingu nokkra íslenskra fyrirtækja. Væri það sérstaklega bagalegt í ljósi þess að vonir eru bundnar við að bein erlend fjárfesting dragi að einhverju marki úr því mikla falli á fjárfestingarstigi í hagkerfinu sem nú er að verða.

Á fundi viðskiptaráðherra með fulltrúum nokkra þessara fyrirtækja í gær kom fram að það er sameiginlegur skilningur Seðlabankans og viðskiptaráðuneytisins að gjaldeyrisreglurnar hefti ekki beina erlenda fjárfestingu.

Það eina sem takmarkar beina fjárfestingu í reglum Seðlabankans er að finna í fyrstu grein þeirra. Þar segir að fjármagnshreyfingar vegna yfirfærslu eða flutnings á fjármunum frá landinu sem tengjast sölu á beinum fjárfestingum eru óheimilar. Höftin lúta því að sölu en ekki kaupum og að þeirri sölu sem fylgir yfirfærsla eða flutningur fjármagns frá landinu.