Meðallaun starfsmanna RUV eru 500.000 kr. á mánuði

Meðallaun starfsmanna RUV nema rétt tæpum 6 milljónum kr. á ári eða 500.000 kr. á mánuði. Meðallaun helstu stjórnenda RUV, að Páli Magnússyni útvarpsstjóra frátöldum eru 9,4 milljónir á ári eða tæplega 800.000 kr. á mánuði.

Samkvæmt ársskýrslu RUV fyrir rekstrarárið 1.9.2007 til 31.8.2008, sem lögð var fram í síðustu viku, námu launagreiðslur félagsins 1.756 milljónum kr. sem skiptist á 324 starfsmenn og fengu þeir því að meðaltali 500.000 kr. á mánuði.

Ef launatengdum gjöldum er bætt við þetta nam kostnaðurinn 2.150 milljónum kr. sem gera tæplega sjö milljónir kr. að meðaltali á hvern starfsmann á árinu.

Heildarlaun og þóknanir til ellefu helstu stjórnenda RUV námu 112 milljónum kr.. Þar af voru laun Páls Magnússonar 18 milljónir kr. Hinir tíu stjórnendurnir fengu því að meðaltali 9,4 milljónir kr. í árslaun.