Brynjar óttast ekki fall

Brynjar Björn Gunnarsson segist í samtali við BBC ekki óttast að Reading verði undir í fallbaráttunni sem er framundan hjá liðinu í ensku úrvalsdeildinni.

Sem stendur er Reading í sautjánda sæti deildarinnar, aðeins einu stigi fyrir ofan Birmingham sem situr í fallsæti.

„Við verðum að standa saman og leggja tvöfalt meira á okkur en hingað til," sagði Brynjar Björn. „Við munum örugglega ná að snúa gengi liðsins á rétta braut og vinna þá fimm eða sex leiki sem þarf sennilega til."

„Það eru enn margir leikir eftir á tímabilinu og enn mörg stig í pottinum. Ég held að við höfum það sem til þarf og ekki síður trúna á því að við höldum okkur uppi."

Brynjar Björn hefur áður staðið í fallbaráttu er hann lék með Stoke í ensku B-deildinni. „Við vorum meðal þriggja neðstu liðanna lengst af á tímabilinu en þegar tveir eða þrír leikir voru eftir náðum við þeim stigum sem til þurfti."

Hann hefur undanfarið átt við meiðsli í nára að stríða en hann segist vonast til að hann jafni sig fljótt. „Batinn er hægur en góður. Vonandi verð ég orðinn klár eftir eina til tvær vikur."