Ferguson óttast að Berba fái óblíðar móttökur

Sir Alex Ferguson stjóri Manchester United hefur nokkrar áhyggjur af móttökunum sem Dimitar Berbatov fær í kvöld þegar hann snýr aftur á gamla heimavöllinn sinn White Hart Lane með liði United.

Búlgarski framherjinn var önnur stjarnan í röðum Tottenham á stuttum tíma sem stingur af til Manchester United og gera má ráð fyrir því að einhverjir af stuðningsmönnum Lundúnaliðsins láti hann heyra það ef hann spilar í kvöld.

Sir Alex hefur áhyggjur af því að verði mikill hiti í leiknum og óttast jafnvel að Berbatov gæti fengið rautt spjald. Hann segir að möguleikar séu á meiri látum í kring um Berbatov af því hann fetaði í fótspor Michael Carrick.

"Ef stuðningsmennirnir verða með læti út í Berbatov er það bara af því hann kaus að ganga í raðir Manchester United. Ef það hefði verið eitthvað annað lið, hefði það ekki skapað svona mikla óánægju," sagði Ferguson og sendi Tottenham eina pillu.

"Einhverra hluta vegna sjá þeir enn eftir að hafa selt okkur Michael Carrick. Það er það sem stendur verst í þeim. En þeir geta ekki kennt okkur um það - það voru þeir sem vildu selja okkur hann a sínum tíma," sagði Ferguson.

Hann segir að Tottenham hafi ekki komið illa út úr Berbatov-kaupunum í sumar þegar félagið seldi hann fyrir 30 milljónir og féll ungan framherja að láni út leiktíðina í kaupbæti.

"Þeir mjólkuðu samninginn vel á lokadeginum. Mjólkuðu hann vel og fengu að lokum Frazier Campbell sem bónus. Þetta voru fín viðskipti. Þeir geta ekki kvartað yfir þeim," sagði Ferguson.

Leikur Tottenham og Manchester United hefst klukkan 17:30 og er sýndur beint á Stöð 2 Sport.