Eimskip sendir frá sér afkomuviðvörun

Eimskipafélag Íslands hefur sent frá sér afkomuviðvörun afkomuviðvörun vegna fyrirséðrar gjaldfærslu á 4. ársfjórðungi. Ábyrgð Eimskips vegna XL flugfélagsins verður gjaldfærð.

Í september tilkynnti Eimskip að ábyrgð myndi falla á félagið vegna gjaldþrots XL Leisure í Englandi, að fjárhæð um 207 milljónir Evra. ,,Nokkur óvissa hefur verið um kröfuna eftir að Samson eignarhaldsfélag ehf. var úrskurðað gjaldþrota. Eimskip mun færa kröfuna til gjalda á fjórða ársfjórðungi en félagið mun jafnframt vinna að því að ná samkomulagi um kröfuna við eiganda hennar," segir í tilkynningu frá fyrirtækinu.

Auk gjaldfærslu vegna XL ábyrgðar eru áætlaðar gjaldfærslur vegna virðisrýrnunar eigna, fyrst og fremst vegna viðskiptavildar á frystigeymslustarfsemi á meginlandi Evrópu, sem nú er í sölumeðferð. Einnig hafa fallið á Eimskip ábyrgðir vegna leigugreiðslna XL flugvéla, eins og kom fram í ársreikningi félagsins. Fyrirtækið segir að fjárhæðir ábyrgðanna liggja ekki enn fyrir en viðræður við kröfuhafa standa yfir.

,,Þar sem endurskoðun á virðisrýrnunarprófum og ársreikningi félagsins er ekki lokið er enn óljóst hver heildargjaldfærsla vegna virðisrýrnunar mun verða á fjórða ársfjórðungi. Ljóst er þó að hún mun ganga stórlega á eigið fé félagsins og munar þar mest um gjaldfærslu vegna XL ábyrgðar."

Eimskipafélag Íslands hyggst vinna að fjárhagslegri endurskipulagningu með innlendum og erlendum ráðgjöfum og er ráðgert að hanni ljúki á fyrri helmingin næsta árs.

,,Lögð hefur verið áhersla á að selja hluta erlendra eigna sem ekki tengjast kjarnastarfsemi félagsins, með það að markmiði að greiða niður skuldir og létta á fjármagnskostnaði. Eimskip er í viðræðum við helstu lánveitendur sína um frestun vaxtagreiðslna og afborgana lána til að vernda lausafjárstöðu félagsins á meðan á söluferli eigna stendur yfir. Viðbrögð lánveitenda hafa almennt verið góð.

Þrátt fyrir að efnahagsástandið á Íslandi hafi verið mjög erfitt hefur Eimskip tekist að tryggja lausafjárstöðu félagsins."

Grunnrekstur félagsins gengur vel þrátt fyrir erfiða skuldastöðu félagsins og erfið skilyrði á fjármálamarkaði. ,,Vel hefur gengið að aðlaga rekstur félagsins að þeim samdrætti sem hefur verið í flutningum til Íslands. Félagið hefur á undanförnum vikum fækkað skipum í rekstri tengdum Íslandi úr 11 í átta, auk þess að gripið var til uppsagna og launalækkana ásamt öðrum hagræðingaraðgerðum. Áætlað er að þessar aðgerðir skili um 2,4 milljarða króna sparnaði á ári. Lausafjárstaðan er góð og grunnrekstur Eimskips er traustur. Félagið mun áfram veita viðskiptavinum félagsins trausta og góða þjónustu."