Anthony skoraði 32 stig í sigri Denver

Einum leik er þegar lokið í NBA deildinni í körfubolta í kvöld. Denver gerði góða ferð til New York og lagði heimalið Knicks 117-110.

Carmelo Anthony sneri aftur í lið Denver eftir að hafa misst úr þrjá leiki vegna meiðsla.

Kappinn hafði greinilega gott af því að taka sér vikufrí um jólin og sallaði 32 stigum á slakt varnarlið New York sem þarna tapaði sínum sjötta leik í röð. Denver var með 57% skotnýtingu í leiknum.

Nate Robinson skoraði 20 stig fyrir New York og David Lee skoraði 19 stig og hirti 12 fráköst. Chris Duhon skoraði 17 stig og gaf 11 stoðsendingar.