Robinho hefur breytt City

Varnarmaðurinn Micah Richards segir að Brasilíumaðurinn Robinho hafi breytt Manchester City. Robinho skoraði þrennu þegar City vann Stoke 3-0 á sunnudag.

Richards segir að það hafi ekki komið sér á óvart hve fljótt Robinho hefur aðlagast enska boltanum. „Það er frábært að æfa með honum. Hann er hæfileikaríkur leikmaður sem býr yfir ótrúlegum hæfileikum," sagði Richards.

„Á hverjum einasta degi kemur hann manni á óvart með tækni sinni á æfingu. Hann er frábær leikmaður og sýnir það á hverjum degi," sagði Richards en Robinho gekk til liðs við City frá Real Madrid á lokadegi félagaskiptagluggans.