Gengi krónunnar lækkaði um 11% á tíu dögum

Gengi krónu hefur lækkað um ríflega 11% undanfarna tíu daga. Enn er þó krónan u.þ.b. 14% sterkari gagnvart helstu gjaldmiðlum en hún var þegar hin takmarkaða endurfleyting hennar hófst að morgni 4. desember síðastliðins.

Fjallað er um málið í Morgunkorni greiningar Glitnis. Þar segir að evran kostar nú ríflega 170 kr. en stóð í 188 kr. í upphafi mánaðarins og Bandaríkjadollar hefur lækkað úr rúmum 147 kr. í 120 kr. það sem af er desember. Í dag hefur krónan nánast staðið í stað gagnvart körfu helstu gjaldmiðla, styrkst lítillega gagnvart evru en lækkað að sama skapi á móti dollaranum.

Gengi krónu gaf töluvert eftir í gær. Lækkaði krónan um 5% gagnvart evru. Virðist sem markaðsaðilar hafi túlkað orð Poul Thomsen, sem fer fyrir sendinefnd Alþjóðagjaldeyrissjóðsins gagnvart Íslandi, um að stutt væri í vaxtalækkun og afléttingu hafta á þann veg að búast mætti við útstreymi gjaldeyris fyrr en síðar.

Gjaldeyrismarkaður er mjög grunnur og lítið þarf til að framboð af gjaldeyri hverfi tímabundið. Markaðurinn er því viðkvæmur. Vera má að þátttakendur á markaði hafi lesið full mikið út úr orðum Thomsen, enda voru þau í stórum dráttum í takti við fram komna aðgerðaráætlun stjórnvalda og IMF um að aflétta gjaldeyrishöftum og lækka vexti um leið og nægilegur stöðugleiki væri kominn á gjaldeyrismarkað.