Alnwick kallaður úr láni

Tottenham hefur kallað markvörð sinn Ben Alnwick til baka úr láni frá B-deildarliði Carlisle.

Alnwick verður ætlað að verða þriðji markvörður á eftir þeim Heurelho Gomes og Cesar Sanchez, en hann gekk í raðir Tottenham fyrir tæpa milljón punda frá Sunderland fyrir tæpum tveimur árum. Hann hefur ekki spilað leik fyrir Tottenham.

Harry Redknapp hefur stokkað mikið upp í herbúðum Tottenham síðan hann tók við af Juande Ramos og hefur kippt nokkrum leikmönnum inn í hópinn á ný sem Ramos var búinn að grafa í varaliðinu og fékk ekki einu sinni treyjunúmer í sumar.

Aðalmarkvörðurinn Gomes hefur gert mörg glórulaus mistök í undanförnum leikjum Tottenham og því hefur verið haldið fram að Redknapp muni selja hann frá félaginu við fyrsta tækifæri í janúar.

Hann virðist nú ætla að sjá hvar hinn efnilegi Alnwick stendur, en hinn 21 árs gamli markvörður hefur átt sæti í U-21 árs liði Englendinga.