Árni í baráttu við Greenspan um hver sé versti bankamaðurinn

Bandaríska vefsíðan The Huffington Post er nú með netkosningu í gangi um hver sé versti bankamaður heimsins. Meðal þeirra níu möguleika sem boðið er upp á er Árni Mathiesen fjármálaráðherra. Árni á þarna í baráttu við menn eins og Alan Greenspan fyrrum seðlabankastjóra Bandaríkjanna, Fred Goodwin forstjóra Royal Bank of Scotland og Richard Fuld forstjóra Lehman Brothers.

Netkosningin þessi er gerð í framhaldi af grein Daniel Gross í tímaritinu Newsweek um hver eigi titilinn versti bankamaður heims. Greint var frá þeirri grein á visir.is í gærdag.

Sem stendur ber Alan Greenspan höfuð og herðar yfir hina áttmenningana sem tilnefndir eru. Hefur Greenspan hlotið rúmlega 26% atkvæða. Í öðru sæti er Hank Paulson fjármálaráðherra Bandaríkjanna með tæplega 20% atkvæða.

Árni Mathiesen er kominn með 5,5% atkvæða og skipar sjöunda sætið á listanum í augnablikinu.

Hægt er að fylgjast með kosningunni á slóðinni:

http://www.huffingtonpost.com/2008/12/03/whos-the-worlds-worst-ban_n_148098.html