Íslenskt brennivín lækkar í verði

Íslenskt brennivín hefur nú lækkað um rúm 6% að meðaltali í verslunum ÁTVR. Þessi lækkun ætti að koma sér vel fyrir skötuveislurnar í desember, enda er skatan vandétin ef ekki fylgir brennivín.

Ölgerðin segir í tilkynningu að hún hafi einnig lækkað verð á öðru sterku íslensku áfengi í verslunum ÁTVR. Eldurís og Tindavodki og skotdrykkirnir Opal og Tópas hafa þannig lækkað í verði um rúm 4% að meðaltali í vínbúðunum.

Að undanförnu hefur ÁTVR tvívegis tilkynnt verðhækkanir og því kærkomin tíðindi fyrir marga að verð fari lækkandi á einhverju sviðum.