Gallas er fórnarlamb nornaveiða

Arsene Wenger, knattspyrnustjóri Arsenal, segir að fyrrum fyrirliðinn William Gallas sé fórnarlamb nornaveiða í breskum fjölmiðlum.

Gallas var sviptur fyrirliðabandinu á dögunum eftir röð óheppilegra yfirlýsinga í blöðunum og fljótlega kemur út ævisaga hans þar sem sagt er að engum hjá Arsenal verði hlíft.

Wenger kom Gallas til varnar í viðtali í frönskum miðlum þar sem hann sagði fjölmiðlaumfjöllun um Gallas hafa sett óþarfa pressu á hann sjálfan og liðið.

"Hvorki hann sjálfur sem persóna eða sem leikmaður var í sviðsljósinu í þessum viðtölum, heldur var fókusinn settur á mistök hans. Þetta voru nornaveiðar og leikmaðurinn á aldrei möguleika þegar svona fer. Honum gekk gott eitt til í þessum viðtölum, en það eina sem þau gerðu var að setja pressu á liðið," sagði Wenger og bætti við að Gallas myndi ná sér fljótlega á strik aftur þegar hann losnaði við fyrirliðabandið.