Burnley sló út Arsenal

Bikarævintýri enska 1. deildarliðsins Burnley hélt áfram í kvöld þegar liðið vann 2-0 sigur á Arsenal. Burnley er þar með komið í undanúrslit ensku deildabikarkeppninnar.

Burnley sló Chelsea út í síðustu umferð keppninnar. Kevin McDonald skoraði bæði mörkin í kvöld en þau komu á 6. og 57. mínútu. McDonald var síðan tekinn af velli eftir klukkutíma leik og inn fyrir hann kom Jóhannes Karl Guðjónsson.

Jóhannes tók tvær aukaspyrnur á þeim tíma sem hann lék en hvorugt skot hans rataði á markið.

Arsenal tefldi fram ungu liði eins og venjulega í þessari keppni en meðalaldur byrjunarliðsins var 19,9 ár. Liðið fékk nokkur mjög góð færi til að skora í leiknum, þar á meðal danski sóknarmaðurinn Nicklas Bendtner en það er með hreinum ólíkindum að hann hafi ekki náð að skora í kvöld.