Drogba í þriggja leikja bann fyrir peningakastið

Sóknarmaðurinn Didier Drogba hjá Chelsea hefur verið dæmdur í þriggja leikja bann fyrir peningakastið í leiknum gegn Burnley í deildabikarnum.

Drogba missti stjórn á skapi sínu og kastaði smápeningi í átt að stuðningsmönnum Burnley.

Leikbannið tekur gildi samstundis en Drogba mun missa af leikjum Chelsea gegn Newcastle, Arsenal og Bolton. Lögreglan er einnig með málið til rannsóknar en engin niðurstaða er komin frá þeim.

Talsmaður enska knattspyrnusambandsins segir það óafsakanlegt að leikmaður setji áhorfendur í hættu með því að kasta hlutum í átt að þeim. Drogba sýndi þeim fingurinn áður en hann kastaði smápeningnum.

Chelsea tapaði leiknum fyrir Burnley eftir framlengingu og vítaspyrnukeppni.