Sven langar í tangó

Breska blaðið Sun birti í dag safaríkar fréttir af nýjasta skotmarki kvennabósans Sven-Göran Eriksson, stjóra Manchester City. Sven mun hafa fallið fyrir hinni glæsilegu Aleshu Dixon og mun ætla að dansa hana upp úr skónum.

Dixon þessi sló í gegn í raunveruleikaþáttunum "Komdu að dansa" sem eru gríðarlega vinsælir í Bretlandi og víðar. Sven er ekki sagður mikið fyrir sjónvarpsgláp, en féll í stafi þegar hann datt inn í þátt sem leikmenn Manchester City voru að horfa á inni á hótelherbergi.

Sven sagði þarna komna píu sem væri alveg hans týpa og bætti við að hann hefði ekkert á móti því að taka fram dansskóna fyrir svona huggulega dömu - sem reyndar er einum 25 árum yngri en hann.

Kvennsemi Sven-Göran Eriksson sá bresku blöðunum fyrir ófáum slúðursögunum þegar Svíinn stýrði enska landsliðinu og blaðamenn þar í landi hafa eflaust tekið gleði sína á ný þegar hann sneri aftur til Englands og tók við Manchester City.