Klúður lögfræðings dýrkeypt fyrir Björgólf

Erfiðar deilur við kvikmyndarisann Paramount settu alvarlegt strik í reikninginn við framleiðslu og markaðssetningu myndarinnar The Perfect Holiday sem Björgólfur Thor Björgólfsson fjármagnaði að hluta.

Mistökin ollu því að fresta þurfti frumsýningu myndarinnar um heilt ár.

Að sögn Ásgeirs Friðgeirssonar, talsmanns Björgólfs Thors, áttu deilurnar við Paramount upptök sín í alvarlegum, lögfræðilegum mistökum sem gerð voru við undirritun samninga við kvikmyndarisann. Lögfræðingurinn sem bar ábyrgð á gerð samninganna var starfsmaður Novators og hefur honum verið sagt upp störfum.

Mistök lögfræðingsins og deilurnar sem fylgdu í kljölfarið gerðu það að verkum að erfitt reyndist að afla myndinni meðbyrs og skilaði það sér í slakri aðsókn og dræmri gagnrýni.

Eins og Vísir greindi frá fyrr í dag olli myndin nokkrum vonbrigðum þegar hún kom út fyrir síðustu jól. Enn er hins vegar ekki útséð með hversu stór hluti fimm milljón dollara fjárfestingar Björgólfs skilar sér.

Ásgeir segir að 40 prósent fjárfestingarinnar hafi þegar skilað sér tilbaka en það sem eftir stendur er meðal annars háð sölu á DVD-diskum.

The Perfect Holiday er ekki fyrsta kvikmyndin sem Björgólfur Thor hefur komið að. Hann tók til dæmis þátt í gerð Vesturportskvikmyndanna Börn og Foreldrar sem Ragnar Bragason leikstýrði og hlaut lof fyrir.

Aðkoma Björgólfs að þessum verkefnum skapaði honum margvíslega reynslu og tengsl við áhrifafólk í alþjóðlega kvikmyndheiminn sem Ásgeir Friðgeirsson segir að nýtt verði til nýrra verkefna.

Engir samningar liggja hins vegar fyrir um ný verkefni en ýmis áhugaverð verkefni eru í athugun.