Björgólfur Thor tapar á 500 milljóna Hollywood fjárfestingu

Ekki er enn útséð hvort fjárfesting Björgólfs Thors Björgólfssonar í bandarísku kvikmyndinni The Perfect Holiday skili sér að fullu. Þetta segir Ásgeir Friðgeirsson, talsmaður Björgólfs.

Vísir hefur heimildir fyrir því að Björgólfur hafi sett rúmar 500 milljónir íslenskra króna í verkefnið en sú fjárfesting mun hafa skilað sér að 2/5 hluta. Enn er heldur ekki útséð með sölu á DVD diskum og fjárfestingunni er því enn lýst sem "work in progress"

Kunnugir segja hins vegar ólíklegt að Björgólfur fái tilbaka alla þá peninga sem hann lagði í The Perfect Holiday. Myndin "floppaði" í kvikmyndahúsum í Bandaríkjunum og fékk vægast sagt vond viðbrögð hjá gagnrýnendum. Ekki hjálpar það svo DVD sölunni að hún fær 2,4 af 10 í meðaleinkunn á kvikmyndasíðunni imdb.com

The Perfect Holiday kom í kvikmyndahús í Bandaríkjunum um síðustu jól. Hún fjallar um litla stúlku sem biður jólasvein í stórverslun um að finna móður sinni eiginmann. Í aðalhlutverkum eru Morris Chestnut og Gabrielle Union en stórstjarnan Queen Latifah fór einnig með lítið hlutverk .

Framleiðslufyrirtæki Latifah kom einnig að framleiðslu myndarinnar en það samstarf endaði ekki vel þar sem Latifah hefur farið í mál við það fyritæki fyrir að hafa ekki greitt henni fyrir að hafa komið fram í myndinni.

Ásgeir Friðgeirsson segir að fjárfesting Björgólfs í The Perfect Holiday hafi verið ákveðið „gæluverkefni" en hann vildi ekki segja hvort Björgólfur hyggi á frekari landvinninga í Hollywood.