Barry fer hvergi í janúar

Martin O´Neill, stjóri Aston Villa, hefur tekið af allan vafa um framtíð miðjumannsins Gareth Barry - í það minnsta fram á sumar.

Sápuóperan í kring um áhuga Liverpool á Barry í sumar var ansi langlíf og O´Neill ætlar greinilega ekki að þurfa að hafa áhyggjur af öðru eins yfir jólavertíðina á Englandi. Hann segist hafa fundað með leikmanninum og ekki komi til greina að hann fari frá Birmingham-borg.

"Þetta eru góð tíðindi fyrir alla og eflir okkur í að sækja áfram í sömu átt. Það er frábært að Gareth sé einbeittur í að spila hérna áfram og við setjumst bara niður aftur í sumar og tökum stöðuna. Gareth hefur spilað vel og er búinn að gleyma því sem gerðist síðasta sumar," sagði O´Neill í samtali við Sky.