Vill heildarendurskoðun á samkeppnisumhverfi fyrirtækja

Ármann Kr. Ólafsson, þingmaður Sjálfstæðisflokksins, lagði í gær fram þingsályktunartillögu um að ríkisstjórninni verði falin heildarendurskoðun á samkeppnisumhverfi íslenskra fyrirtækja.

Í greinagerð með tillögunni segir Ármann að til að hægt sé að endurreisa íslenskt viðskipta- og efnahagslíf á sem stystum tíma verði að ríkja öflug samkeppni hér á landi. „Því miður er mikil hætta á að ríkjandi ástand ýti undir samþjöppun og hún verði enn meiri en við höfum upplifað á undanförnum árum. Slíkt getur dregið mjög úr hraða endurreisnarinnar þar sem frumkvæði og framtakssemi þjóðarinnar nær ekki fullum skriðþunga," segir í greinagerðinni.

Ármann segir að reynslan sýni að aðgerðir til þess að viðhalda og efla samkeppni stuðli að hraðari endurreisn atvinnulífsins. Nú þegar þjóðin standi frammi fyrir miklum efnahagserfiðleikum í kjölfar bankahrunsins hafi aldrei verið mikilvægara að horfa til framtíðar og undirbúa næstu skref til viðreisnar íslensku efnahagslífi. Samkeppnisumhverfi íslenskra fyrirtækja sé gallað. „Hringamyndun og krosseignarhald hefur fengið að þrífast hér á landi, fákeppni hefur blómstrað og fyrirtæki hafa misbeitt markaðsráðandi stöðu sinni um áraraðir. Þetta sést glöggt þegar horft er til smásöluverslunar, matvöruiðnaðarins, fjölmiðla- og fjarskiptamarkaðarins, samgöngufyrirtækja og lyfjamarkaðarins svo eitthvað sé nefnt," segir í greinagerðinni

Þá segir Ármann jafnframt að verðlag hafi hækkað með veikingu krónunnar. Ef fákeppni eða samkeppnisskortur ríkir á markaðnum muni myndast mikil tregða til verðlækkana síðar Við slíku ástandi verði að sporna og má ljóst vera að forsenda þess sé öflugri samkeppnismarkaður.