Viðskipti innlent

Gengisvísitalan hækkar áfram

Gengisvísitala krónunnar hélt áfram að veikjast í dag endaði í 159 stigum. Segir í hálffimmfréttum Kaupþings að gengi krónunnar hafi ekki lokað yfir 160 stigum en í marsmánuði fór vísitalan talsvert yfir 160 stig innan dags.

„Engar augljósar skýringar eru fyrir því að gengið hefur lækkað á allra síðustu vikum. Líklegt er þó að töf á erlendri lántöku ríkissjóðs fari fremur illa í gjaldeyrismarkaðinn. Sömuleiðis má benda á að erlendar hávaxtamyntir hafa heldur gefið eftir upp á síðkastið, sem helst að einhverju leyti í hendur við vaxandi áhættufælni á erlendum mörkuðum," segir greiningardeild Kaupþings.

Enn fremur bendir greiningardeildin á að sá vaxtamunur sem fjárfestar standi frammi fyrir á gjaldmiðlaskiptamarkaði sé enn langt frá þeim gildum sem REIBOR/LIBOR vaxtamunur gefi til kynna. „Á meðan sú er raunin má ætla að krónan verði veik í sögulegu ljósi. Þessi staða endurspeglar að stórum hluta erfið fjármögnunarskilyrði út í heimi. Á meðan ekki berast tíðindi af erlendri lántöku ríkissjóðs eða fjármögnun íslensku viðskiptabankanna er ljóst að krónan gæti áfram átt undir högg að sækja," segir greiningardeildin.



Mest lesið


Fleiri fréttir

Sjá meira


×

Mest lesið