Áldrifin endurreisn Íslands gæti tafist að mati Fitch

Matsfyrirtækið Fitch Ratings telur að áætlanir íslenskra stjórnvalda um áldrifna endurreisn Íslands muni líklega taka lengri tíma en stjórnvöld telja. Hækkandi álverð og þar með útflutningsverðmæti landsins eru lykilatriði í áætlunum stjórnvalda en raunveruleikinn verður annar.

Í nýrri skýrslu Fitch um Íslands sem birt hefur verið á vefsíðu Seðlabankans kemur m.a. fram að verð á áli og annarri hrávöru á heimsmarkaðinum fari nú lækkandi.

Ísland reiði sig hinsvegar á tekjur af álútflutningi eftir bankahrunið enda er útflutningsverðmætið á áli nú hærra en á fiskinum. Álið nam um 40% af öllum útflutningi Íslands á fyrstu tíu mánuðum ársins samanborið við 27% á sama tímabili í fyrra. "Hinsvegar um leið og Ísland hefur orðið háðara áltekjum hefur verðið lækkað um 30% á árinu," segir Fitch.

Ástæðan er einföld segir Fitch. Mikið af nýjum álverum hafa komist í gagnið á þessu ári og því síðasta, á sama tíma og markaðsverðið lækkar og verulega er verið að draga úr framleiðslunni.

Fitch segir að á sama tíma og íslensk stjórnvöld byggi helst vonir sínar á skörpum viðsnúningi á viðskiptahalla landsins, keyrður að miklu leyti á minnkandi innflutningi, gætu versnandi efnahafshorfur á alþjóðavísu sett strik í reikninginn.