FME sektar Icelandair Group um eina milljón kr.

Stjórn Fjármálaeftirlitsins (FME) hefur ákveðið að sekta Icelandair Group um eina milljón kr. vegna brota á lögum um verðbréfaviðskipti.

Fjármálaeftirlitið komst að þeirri niðurstöðu að Icelandair Group hf. hefði brotið gegn lögunum með því að tilkynna ekki innan tilskilinna tímamarka um tvenn viðskipti fruminnherja sem urðu með bréf í félaginu.

Samkvæmt lögum ber útgefanda að tilkynna samdægurs til Fjármálaeftirlitsins þegar fruminnherji hefur tilkynnt honum um viðskipti með fjármálagerninga útgefandans.

Um var að ræða tvenn viðskipti, annars vegar sölu á 500.000 hlutum á genginu 18,3 á hlut, og hins vegar sölu á 500.000 hlutum á genginu 18,1 á hlut. Markaðsvirði viðskiptanna var því samtals 18.2 milljón kr.

Félaginu barst tilkynning um viðskiptin frá fruminnherjanum eftir lokun markaðar þann 9. júní 2008 en tilkynning frá félaginu til Fjármálaeftirlitsins barst að morgni þess 11. júní 2008.