Rússar tilbúnir með 60 milljarða kr. lán til Íslands

Dmitry Pankin fjármálaráðherra Rússlands segir að Rússar séu nú tilbúnir til að lána Íslendingum 500 milljónir dollara eða tæplega 60 milljarða kr.. Pankin segir að lánið verði veitt um leið og íslensk stjórnvöld samþykki að taka á móti þessari aðstoð.

Í frétt um málið á Reuters er vitnað í Pankin sem segir að fjárhagsstaðan sé nú meir og minna eðlileg í Rússlandi. "Miðað við áhættuna í dag getum við látið fé af hendi rakna til Íslands en það mál verður að afgreiða pólitískt," segir Pankin.

Samkvæmt þessu ætla Rússar að lána Íslendingum um tíunda hlut af þeirri upphæð sem rætt var um í haust. Eins og fram kom í fréttum þá var rætt um að Rússar myndu lána Íslendingum 4 milljarða evra eða rúmlega 600 milljarða kr..