Ince: Enginn krísufundur

Paul Ince, knattspyrnustjóri Blackburn, segir að fundur sinn með stjórn félagsins hafi ekki verið krísufundur. Pressan á Ince er mikil en Blackburn hefur aðeins unnið þrjá leiki af sextán.

„Það eru fimm vikur síðan þessi fundur var ákveðinn. Sumir aðilar vilja láta líta út eins og þetta hafi verið krísufundur en þetta var ekkert í þá átt. Við áttum gott tveggja tíma spjall," sagði Ince.

„Vonandi förum við að komast á beinu brautina. Janúarmánuður er að renna upp og við munum reyna að bæta við einum eða tveimur leikmönnum."

„Það hefur fullt af bulli verið skrifað um mig allan minn feril. Það er bara fólk sem er að reyna að skapa vandræði. Það er mikilvægt fyrir mig að vera ekki að hugsa út í það og einbeita mér að mínum leikmönnum. Það er mitt mikilvægasta fólk," sagði Ince.