Brown frá í fimm vikur

Wes Brown, varnarmaður Manchester United, leikur ekki næstu fimm vikurnar vegna ökklameiðsla sem hafa verið að hrjá hann. Þessi 29 ára leikmaður lék síðast í 1-1 jafntefli gegn Everton þann 25. október.

Brown var virkilega góður á síðasta tímabili með United og þá hefur hann einnig staðið sig vel með enska landsliðinu.

„Þetta eru mikil vonbrigði. Sem betur fer eigum við þó nóg af möguleikum í hægri bakvörðinn með Gary Neville, Rafael Da Silva ohJohn O'Shea," sagði Sir Alex Ferguson, stjóri United.

Brown hefur oft verið að glíma við meiðsli á ferli sínum. Eftir að hafa sannað sig hjá United þegar liðið vann þrennuna 1998-1999 þá missti hann af öllu tímabilinu þar á eftir vegna hnémeiðsla.

Þrátt fyrir að hafa síðan aftur meiðst á hné þá gat hann verið með enska landsliðinu á HM 2002 en ökklabrotnaði síðan í leik með United í Meistaradeildinni sama ár. Hann er samningsbundinn liðinu til 2012.