Undrast ákvörðun þýskra yfirvalda varðandi Kaupþing Edge

Steinar Þór Guðgeirsson, formaður skilanefndar gamla Kaupþings, segir það koma flatt upp á sig að þýsk yfirvöld ætli að lána tryggingasjóði innistæðueigenda á Íslandi þrjú hundruð og átta milljónir evra, nærri fimmtíu og fimm milljarða króna, svo greiða megi út innistæður viðskiptavina Kaupþings Edge í Þýskalandi. Þýska blaðið Spiegel greinir frá því á vefsíðu sinni og hefur eftir talsmanni þýska fjármálaráðuneytisins.

Steinar Þór segir fulltrúa þýska fjármálaráðuneytisis ekki hafa lagt til þessa lausn í viðræðum í síðustu viku, allt annað hafi verið upp á borðinu. Eignir hafi átt að ganga upp í skuldir líkt og gert hafi verið með Kaupþing Edge í Austurríki, Finnlandi, Noregi og Svíþjóð. Steinar Þór segir á morgun verði ákveðið hvenær næsti viðræðufundur verði haldinn vegna málsins.

Kaupþing Edge var víða rekið af dótturfélögum, þar á meðal í Bretlandi, Belgíu og Lúxembúrg og féll því undir tryggingasjóði viðkomandi landa. Í Austurríki, Skandinavíu og Þýskalandi var Kaupþing Edge útibú og undir ábyrgð íslensk tryggingakerfisins að hluta líkt og Icesave.